கேரளாவில் வரலாறு காணாத வெள்ளம்! மத்திய அரசு தாமதிக்காமல் உதவ வேண்டும்!

0
35
கேரளாவில் வரலாறு காணாத வெள்ளம்!
மத்திய அரசு தாமதிக்காமல் உதவ வேண்டும்!
விடுதலைச் சிறுத்தைகள் கட்சி வலியுறுத்தல்!

கேரளாவில் இடைவிடாது பெய்யும் மழையின் காரணாமாக வரலாறு காணாத வெள்ளப்பெருக்கு ஏற்பட்டுள்ளது. இடுக்கி,பாலகோடு உள்ளிட்ட 11 மாவட்டங்கள் தண்ணீரில் மூழ்கியுள்ளன. இதுவரை சுமார் 40 பேர் உயிரிழந்திருப்பதாகத் தெரிய வந்துள்ளது. பல்லாயிரக்கணக்கானோர் முகாம்களில் தங்க வைக்கப்பட்டுள்ளனர். வெள்ளத்தால் பாதிக்கப்பட்டுள்ள கேரள மக்களுக்கு உதவ வேண்டியது மனிதநேயமுள்ள ஒவ்வொருவரின்  கடமையுமாகும். இந்தப் பேரிடர் பாதிப்புச்சூழலில் மத்திய அரசு காலம் தாழ்த்தாமல் தேவையான உதவிகளை கேரள அரசுக்கு உடனடியாக வழங்க வேண்டுமென விடுதலைச் சிறுத்தைகள் கட்சியின் சார்பில் வலியுறுத்துகிறோம்.

கேரளாவில் பெய்து வரும் கனமழையால் இடுக்கி அணை உட்பட மாநிலத்தில் உள்ள 27 அணைகளும் நிரம்பிவிட்டன. அவற்றிலிருந்து தண்ணீர் திறந்துவிடப்படுவதால் வெள்ளப்பெருக்கு அதிகரித்து வருகிறது. நிலச்சரிவு ஏற்பட்டு பல்லாயிரக் கணக்கானோர் வீடுகளை இழந்துள்ளனர். இந்நிலையில் அண்டை மாநில அரசுகளும் தனிநபர்களும் கேரள அரசுக்கு உதவி செய்து வருகின்றனர். தமிழக அரசு ரூபாய் 5 கோடி அளித்துள்ளது. ஆனால், மத்திய அரசு இன்னும் நிவாரணத் தொகை எதையும் அறிவிக்கவில்லை. ஓக்கி புயல் தாக்கிய போது பாராமுகமாக இருந்தது போல இப்போதும் மத்திய அரசு இருந்துவிடக்கூடாது. கேரளாவை பேரிடரால் பாதிக்கப்பட்ட மாநிலமாக அறிவிப்பதுடன், உடனடியாக பேரிடர் நிவாரண நிதியிலிருந்து ரூபாய் 5000 கோடி தொகையை முதல் தவணையாக கேரள அரசுக்கு வழங்க வேண்டுமென வலியுறுத்துகிறோம்.

கேரளாவுக்கு ரூ.5 கோடி உடனடியாக நிதியுதவி அளித்த தமிழக முதல்வருக்கு  நன்றியையும் பாராட்டுகளையும் தெரிவித்துக் கொள்கிறோம்.

இவண்:
தொல்.திருமாவளவன்.
நிறுவனர்- தலைவர், விசிக.

LEAVE A REPLY

Please enter your comment!
Please enter your name here