விடுதலைச் சிறுத்தைகள் கட்சியின் துணை அமைப்புகள் & அணிகள்

இயக்கத்தின் பொதுக்கூட்டங்கள், பேரணிகள், மாநாடுகள் போன்ற பல்வேறு நிகழ்ச்சிகளின்போது, அவை அமைதியாகவும், கட்டுப்பாடாகவும் நடந்தேற, அவற்றை ஒழுங்குபடுத்துதல் மற்றும் பாதுகாப்பு அளித்தல் போன்ற பணிகளைத் தொண்டரணி மேற்கொள்ளும். உடற்பயிற்சி, தற்காப்புப்பயிற்சி மற்றும் பொதுமக்களின் பாதுகாப்பிற்கானப் பயிற்சி ஆகியவற்றுடன் மனநலம் உள்ளிட்ட நல்லொழுக்கப் பயிற்சிகளும் பெற்ற, சீருடை அணிந்த குழுவாகத் தொண்டரணி இயங்கும். வாய்ப்புள்ளச் சூழல்களில் மகளிர் தொண்டரணியும் உருவாக்கப்படும்.

ஒடுக்கப்பட்ட மக்களுக்கெதிரான அரச வன்கொடுமைகள் மற்றும் சாதிய வன்கொடுமைகளை எதிர்த்துப் போராடும் சூழலில், மக்களின் மீதும், இயக்கத்தின் மீதும் திணிக்கப்படும் பொய்வழக்குகள், காவல் விசாரணைகள், வழக்குமன்ற விசாரணைகள், சிறைத்தண்டனைகள் போன்ற நெருக்கடிகளிலிருந்து மக்களையும் இயக்கத்தையும் பாதுகாப்பதே வழக்கறிஞர் அணியின் தலையாய நோக்கமாகும்.

ஒடுக்கப்பட்ட உழைக்கும் மக்களிடையே சுற்றுப்புறத்தூய்மை, சுகாதாரம், குடும்பநலம், நோய்த்தடுப்பு மற்றும் முதலுதவி உள்ளிட்ட மருத்துவ விழிப்புணர்வை ஏற்படுத்துவது, பில்லி, சூனியம், ஏவல் போன்ற செய்வினைகள் மற்றும் பேய், பிசாசு போன்ற மருத்துவத்திற்கெதிரான மூடநம்பிக்கைகளிலிருந்து மக்களை மீட்டெடுப்பது மிக முக்கியக் கடமையாகும்.

இந்தியச் சமூகக் கட்டமைப்பில் சமூக, பொருளாதார, பண்பாட்டு அடிப்படையில் மக்களை ஆயிரக்கணக்கான குழுக்களாகக் கூறுபடுத்தி, நீண்ட நெடுங்காலமாக ஒன்றுக்கொன்று முரண்பட்டு மோதிக் கொள்ளவும், ஒன்றையொன்று அடிமைப்படுத்தி இழிவுபடுத்தவும், சுரண்டவும் சாதியும், மதமும் அடிப்படையாக அமைகின்றன. இந்நிலையில் சாதி, மத அடிப்படையிலான முரண்பாடுகளைக் களைந்து சமத்துவத்தை வென்றெடுக்கும் தொலைநோக்கில், சமூகம் மற்றும் மத நல்லிணக்கத்தை உருவாக்குவதே சமூக நல்லிணக்க அணியின் நோக்கமாகும்.